אין די צייט וואס די מצב הבריאות ביי כ"ק אדמו"ר מבית שמואל צבי ספינקא שליט"א איז זייער אנגעשטרענגט ל"ע, האט חותנו הגדול כ"ק אדמו"ר מקרעטשניף שליט"א אונטערגענומען א נסיעה קיין אמעריקע צו מבקר חולה זיין ביי חתנו חביבו, דורש זיין בשלומו און מחזק זיין די בני המשפחה אין דעם שווערן מצב.
דער ספינקא רבי שליט"א געפונט זיך ליידער אין א קריטישע מצב, ליגענדיג על ערש דוי אין די מאונט סיני שפיטאל אין מאנהעטן, נאך פארשידענע קאמפליקאציעס וואס האט זיך געשאפן אינעם רבינ'ס געזונט, און די דאקטוירים זאגן אז מען דארף גרויס רחמי שמים אז דער רבי זאל זיך קענען ארויסדרייען פון דעם שווערן צושטאנד.
דער קרעטשניפער רבי שליט"א וועלכער איז שוין נישט קיין אינגערמאן, און א נסיעה קיין אמעריקע איז ווייט נישט פון די גרינגע זאכן ביים רבי'ן, האט אבער אויסגעדרוקט רצון קדשו ארויסצופארן קיין אמעריקע צו מבקר חולה זיין ביים איידעם דער ספינקא רבי'ן, און מחזק זיין די בני המשפחה, זיין חשובע טאכטער די ספינקא רעבעצין תליט"א און די קינדער און אייניקלעך.
דער רבי שליט"א איז ארויסגעפארן פון ארץ ישראל היינט מאנטאג נאכמיטאג, און איז ערווארטעט צו לאנדן אין ניו יארק ארום ניין דרייסיג אויפדערנאכט, דער רבי שליט"א איז ערווארטעט זיך אויפצוהאלטן אין ניו יארק פאר עטליכע טעג, און באזוכן ביים איידעם דער ספינקא רבי'ן אין די מאונט סיני שפיטאל.
