נעכטן זונטאג פארנאכטס ביים גרויסן יארצייט טיש אין ביהמ"ד הגדול סאטמאר אין קרית יואל, לרגל די הילולא קדישא פון כ"ק אדמו"ר הרה"ק מסאטמאר זי"ע, האט ממשיך דרכו בקודש כ"ק אדמו"ר מסאטמאר שליט"א ווי יאר יערליך אויפגעטרעטן מיט לענגערע דברות קודש במשנתו של בעל ההילולא, איבערחזר'נדיג די יסודות איתנים וואס דער בעל ההילולא האט געלערנט פאר אנשי שלומו, בפרט מיט די דעה והשקפה וויאזוי צו מקבל זיין דעם עול הגלות און נישט ווערן נאכגעשלעפט נאך דעם רעיון הציוני.
דערביי האט דער רבי שליט"א אדרעסירט די לעצטיגע ערשיינונגען אין ניו יארק, ווען היימישע אידן טוען אטאקירן דעם מוסלעמענער מעיאר פון ניו יארק זאהראן מאמדאני. דער רבי שליט"א האט זיך אויסגעדרוקט אז אידישע קינדער דארפן וויסן אז מיר זענען אין גלות, און ירמי' הנביא האט שוין געזאגט פאר די אידישע קינדער "דרשו את שלום העיר אשר הגליתי אתכם שמה", ערליכע אידן דארפן זיך פירן על פי דרכי התורה און מקבל זיין דעם גזירת הגלות, און נישט חלילה שרייען און באשולדיגן די שטאטישע באאמטע.
דער רבי האט ערווענט אז דאס וואס מען באשולדיגט דעם מעיאר מיט אנטיסעמיטיזם, ברענגט דאס א פארקערטע רעאקציע, מיט פארשטערקערטע אנטיסעמיטיזם, און דאס איז ריכטיגע התגרות באומות, נישט גענוג אז מען רייצט זיך אין ארץ ישראל, ברענגט מען נאך התגרות באומות אהער קיין אמעריקע, און מען דארף זיין זייער געווארנט דערפון.
