אין די יעצטיגע וואכן איז אפירגעקומען א היסטארישער "נטילת ידים טעפל" מיט וואס עס האט זיך באנוצט אין די ימי חג הפסח דער באקאנטער צדיק מפורסם הרה"ק מריבניץ זצוק"ל, וואס די טעפל איז געווארן אהערגעשטעלט לויט זיינע אנווייזונגען און הדרכות.
אין יאר תשל"ד איז דער טעפל ערצייגט געווארן, בעת ווען דער ריבניצער רבי איז צום ערשטן מאל אנגעקומען קיין אמעריקע, און האט זיך דאן אויפגעהאלטן אין בארא פארק אין שטוב פון זיין געטרייער נאמן בית הרב החסיד ר' איציק וואלף הערמאן ז"ל וועלכער האט זוכה געווען משמש צו זיין דעם ריבניצער רבי'ן נאך אונטערן אייזענעם פארהאנג אין רוסלאנד.
דער זון פון ר' איציק וואלף, הרה"ח ר' יחזקאל הערמאן הי"ו דערציילט, אז דער ריבניצער רבי זצ"ל האט דאן געבעטן אז מען זאל אים ערצייגן דעם ספעציעלן טעפל לויט זיינע אנווייזונגען, ווי גרויס די טעפל זאל זיין, ווי גרויס די הענטלעך זאל זיין און אלעס ארום.
קעגן איבער די ביהמ"ד פונעם ריבניצער רבי'ן זצ"ל האט זיך געפונען א בלעכעריי, וואו מען האט באשטעלט דעם טעפל, און במשך א לענגערע תקופה האט מען דאס ערצייגט לויט אלע אנווייזונגען פונעם ריבניצער רבי'ן זצ"ל, ווען אינצווישן איז דער ריבניצער רבי אליינס אריבער עטליכע מאל צום בלעכעריי נאכפאלגן די ארבעט, ביז ווען עס איז פארענדיגט געווארן לקראת חג הפסח תשל"ה.
דער טעפל איז זייער גרויס, אומגעפער דריי מאל אזוי גרויס ווי א געווענליכער וואסער-טעפל, און נעמט אריין אין זיך בערך א האלבע גאלאן וואסער, נאכצוקומען דעם זהירות פונעם ריבניצער רבי'ן זיך צו וואשן מיט אסאך וואסער לתוספות טהרה.
נאכדעם ווי עס איז פארענדיגט געווארן, האט דער ריבניצער רבי זיך באנוצט מיט דעם טעפל במשך די ימי החג, און עס איז פארבליבן זיין טעפל אויף די ימי חג הפסח פון די שפעטערע יארן פארמאגנדיג ביי אים א געוואלדיגן חשיבות.
דורשי רשומות צייכענען צו, אז דער טעפל איז דער זעלבער פארעם אין אויסזען און אין גרויסקייט, צום טעפל פון מורו ורבו הרה"ק משטעפינעשט זצ"ל, וואס געפונט זיך היינט באוצרו הטוב פון כ"ק אדמו"ר מסקווירא שליט"א.
מארגן מיטוואך אינעם יום המסוגל ערב ראש חודש אלול, ווען טויזענטער אידן וועלן פוקד זיין דעם ציון הק' פון הרה"ק מריבניץ זצ"ל אויפן וויזניצע בית החיים אין מאנסי, וועט זיין א ערשטמאליגע געלעגנהייט פאר די טויזענטער מתפללים זיך צו קענען וואשן די הענט מיט דעם הייליגן טעפל, חפץ קודש שנשתמש בו אותו צדיק, פאר א מינימאלע נדבה פאר א חשובע צדקה צוועק.
פאר מער פרטים שיקט אן אימעיל צו: ribnitztepel@gmail.com
