אינעם גרויסן סאטמארער קעמפ מחנה רב טוב, מחנה יהודה אין נעפאנעק, וואו עס לערנען טויזענטער קינדערלעך אין לויף פון די זוממער וואכן, און באקומען דעם ריינעם סאטמארער חינוך, גרייט מען זיך אין די טעג אויפצובויען א שפאגל נייע בנין פאר א חדר אוכל, צו קענען אקאמאדירן די טויזענטער תלמידים בליעה"ר.
דאס קומט נאך כמעט זיבעציג יאר וואס מען באנוצט זיך מיטן זעלבן חדר אוכל, וואס איז צוגערישט געווארן מיט צענדליגע יארן צוריק מיטן התייסדות המחנה, בהלו נרו פונעם מייסד המחנה הרה"ק מסאטמאר זי"ע, און עס זעהט זיך שטארק אן די נויט אהערצושטעלן א נייע גיגאנטישע חדר אוכל וואו די טויזענטער תלמידים זאלן קענען עסן מיט הרחבת הדעת און אנשעפן די נויטיגע כוחות צו קענען אנגיין טאג טעגליך.
דעם זונטאג כ"ו אב ביומא דהילולא קדישא פון הרה"ק מסאטמאר זי"ע, זענען חסידי סאטמאר איבערראשט געווארן מיט די מודעה אז א חשובער נדבן האט אפגעקויפט דעם זכות שם ההיכל פאר א מיליאן דאללער, און עס וועט גערופן ווערן "היכל רבינו יואל". אצינד גרייט מען זיך צום פייערליכן מעמד הנחת אבן הפינה וואס וועט פארקומען דעם קומענדיגן זונטאג פרשת כי תצא, אין שפיץ פון כ"ק אדמו"ר מסאטמאר שליט"א.
