אן ערהאבענער מעמד כבוד התורה איז פארגעקומען פארגאנגענע וואך אינערהאלב רשת הכוללים יערות הדבש, בראשות כ"ק הגה"צ המקובל רבי משה פריש שליט"א אבד"ק יערות הדבש, נאך וואס אריבער פערציג אינגעלייט פון כולל הלכות שבת האבן זיך געשטעלט צום פארהער אויף גאנץ הלכות מוקצה, וואס זיי האבן דורכגעלערנט און דורכגעאקערט מיט גרויס התמדה און יגיעה אין לויף פון די לעצטע יאר און א האלב.
ביים מעמד ברנה יקצורו האבן די לומדי הכולל זיך געשטעלט צום פארהער פארנט פון גדולי הרבנים, הגה"צ ר' ברוך יודא היימליך שליט"א מדייני תולדות אהרן, הגה"צ ר' אפרים פישל מוטצען שליט"א גאב"ד קרית הבעש"ט אין פתח תקוה, און הגה"צ ר' חיים שמערלער שליט"א רב ביהמ"ד היכל צבי דחסידי צאנז אין ירושלים.
ביים פארהער וואס האט געדויערט איבער א שעה האבן די לומדי הכולל ארויסגעוויזן זייערע הפלא'דיגע ידיעות אין גאנץ הלכות מוקצה, מיט א מורא'דיגע קלארקייט בעיון רב, יעדע שערי ציון און יעדע ביאור הלכה, ווען די גדולי הרבנים זענען נבהל ונשתומם פון די קלארע ידיעות.
עס האט נאכגעפאלגט מיט א רייכע סעודה לגומרה של תורה, און א מעמד יומא טבא לרבנן, עטליכע אינגעלייט האבן אויפגעטרעטן מיט דברות קודש און מען האט זיך ארויסגעלאזט אין פייערליכע ריקודין לכבודה של תורה.
אזוי אויך איז פארגעקומען א שיינע מעמד סעודת הילולא לכבוד כ"ו אב, יומא דהילולא קדישא פון הרה"ק מסאטמאר זי"ע, פאר די נאנט צו הונדערט אינגעלייט פון כולל עלות השחר שע"י מוסדות יערות הדבש, וואס זענען עוסק בתורה בהתמדה רבה יעדן פארטאגס פאר עטליכע שעה, דורכאויס דעם גאנצן יאר אן קיין אפשטעל, אפילו אין די בין הזמנים טעג.
מען האט געהערט א דרשה פון הרה"ג ר' ישראל בראג שליט"א ראש ישיבת תפארת אביגדור אין קליוולאנד, און א דרשה פון הרה"ג ר' טובי' פריינד שליט"א, וועלכער האט געברענגט א היסטארישע חפץ פון די היכלות פארשטעלונג, א היסטארישע שטריימל פונעם בעל ההילולא הרה"ק מסאטמאר זי"ע, מיט וואס דער סאטמארער רבי זי"ע איז אנגעקומען קיין אמעריקע בשנת תשי"ז, און דערמיט מקדש געווען דעם אמעריקאנעם באדן.
הגה"צ אבד"ק יערות הדבש שליט"א האט זיך ארויסגעלאזט אין א פייערדיגן ריקוד מיט דעם הייליגן שטריימל, אויף די זעקסטע הקפה ניגון פון סאטמאר, אינאיינעם מיט די חשובע לומדי הכולל וואס האבן זיך מיטגעפריידט לכבודה של תורה ולומדיה.
