בחצר הקודש ראחמיסטריווקא גרייט מען זיך די טעג אויף א געהויבענע שמחה ביים רבי'ן אין הויף, די שמחת החתונה פון א אייניקל ביי כ"ק אדמו"ר מראחמיסטריווקא שליט"א, די חתן א זון פון חתנא דבי נשיאה הגה"צ ר' פנחס אלימלך שטיין שליט"א, זון פון כ"ק אדמו"ר מפאלטישאן בענסענהוירסט שליט"א, מיט די כלה א טאכטער פון הגה"צ ר' קלמן האלבערשטאם שליט"א אדמו"ר מצאנז קרית יואל און מנהל ישיבה גדולה ד'סאטמאר קרית יואל סניף קדושת יואל.
אנדערש ווי געווענליך ווען די שמחות בחצר הקודש ווערן אפגעראכטן אין ביהמ"ד הגדול ראחמיסטריווקא, וועט ביי די דאזיגע שמחה געפראוועט ווערן די שמחת החתונה במקום מגורי הכלה אין קרית יואל, און די שמחת האויפרוף בצל הקודש וועט געפראוועט ווערן אין מחנה אהל יצחק ראחמיסטריווקא אין די קעטסקילס, שטייענדיג נאך אינעם זוממער סעזאן ווען פילע אידן וויילן אין די קאנטרי בערג.
היינט מיטוואך וועט כ"ק אדמו"ר מראחמיסטריווקא שליט"א ארויספארן צו די קעטסקילס און דארט וויילן פאר די קומענדיגע טעג, בביתו נאוה קודש אין קרית מחנות ראחמיסטריווקא אין גרינפיעלד פארק. מארגן דאנערשטאג וועט פארקומען די הקפות וקבלת פני החתן כנהוג, מיט די באטייליגונג פון די הונדערטער ילדי התשב"ר אין מחנה אהל יצחק, און די בחורים פון מחנה אהל יוחנן, עס וועט נאכפאלגן מיט א מסיבת לחיים אין די נייע פראכטפולע ביהמ"ד אין מחנה אהל יצחק, אינאיינעם מיט א סיום ששה סדרי משנה וואס די בחורים האבן געלערנט לזכר נשמתו פון כ"ק אדמו"ר הרה"ק מראחמיסטריווקא זצ"ל.
אויף שבת קודש איז ערווארטעט א גרויסע ציבור געסט וואס וועלן קומען מיטהאלטן דעם שבת של שמחה שבת אויפרוף בצל הקודש, איבערהויפט די בני המשפחה אדמורי"ם ורבנים, מוצאי שבת וועט פארקומען די שמחת הפארשפיל כנהוג, און שפעטער די שמחת החתו מאהל אין ביהמ"ד הגדול אין מחנה אהל יצחק.
די שמחת החתונה וועט פארקומען זונטאג כי תבוא אין זאל פון גינת קליין אין קרית יואל, וואו הונדערטער חסידים וועלן זיך מיטפרייען מיט די פרייליכע שמחה בבית צדיקים. דאנערשטאג וועט פארקומען די צענטראלע שבע ברכות אין ביהמ"ד הגדול ראחמיסטריווקא אין בארא פארק במעמד קהל רב.
