בחצר הקודש סקווירא גרייט מען זיך די טעג אויף א געהויבענע שמחה ביים רבי'ן אין הויף, אבער אנדערש ווי געווענליך וועט דאס מאל זיין די ערשטע חתונה פון א אייניקל ביים רבי'ן, וואו דער רבי וועט זיך נישט משתתף זיין פערזענליך, וויבאלד די שמחת החתונה קומט פאר אין ארץ ישראל במקום מגורי החתן והכלה.
די רעדע איז פון די שמחת החתונה פון א אור אייניקל ביים רבי'ן, עלטסטע אייניקל ביים רבינ'ס איידעם כ"ק אדמו"ר מזוועהיל ארה"ב שליט"א, די כלה א טאכטער פון זיין עלטסטן זון הרב גדלי' יעקב לייב גאלדמאן שליט"א, איידעם ביי הגה"צ ר' יעקב ישעי' זאב גראס שליט"א אבד"ק האלמין ביתר, זון פון כ"ק אדמו"ר מהאלמין שליט"א, און איידעם ביי כ"ק אדמו"ר מזוטשקא זצ"ל. די חתן איז א זון פון הרב יוסף שיף שליט"א, איידעם ביי כ"ק אדמו"ר ממודזיץ שליט"א.
וויבאלד סיי די חתן און סיי די כלה וואוינען אין ארץ ישראל, וועט די שמחת החתונה געפראוועט ווערן אין ארץ ישראל, ווען דער גרויסער עלטער זיידע כ"ק אדמו"ר מסקווירא שליט"א וועט זיך מיטפרייען מריחוק מקום. די המשך ימי השמחה וועט אבער יא געפראוועט ווערן מיטן רבינ'ס השתתפות, ווען די חתן כלה און מחותנים וועלן קומען צו פארן קיין אמעריקע פראווענען א גרויסע שבע ברכות און שבת שבע ברכות בצל הקודש אין שיכון סקווירא.
די שמחת האויפרוף קומט פאר דעם שבת קודש אין ביהמ"ד הגדול מודזיץ אין בני ברק, די שמחת החתן מאהל מוצאי שבת קודש אין זאל פון בית מלכה אין ירושלים, און צומארגנס זונטאג פרשת כי תבוא וועט פארקומען די שמחת החתונה אין זאל פון היכלי מלכות אין בני ברק. די ערשטע צוויי שבע ברכות'ן וועט געפראוועט ווערן בקרב המשפחה אין ארץ ישראל, און מיטוואך וועט שוין געפראוועט ווערן די שבע ברכות דא אין ניו יארק, אין ביהמ"ד ברכת שלמה זוועהיל אין מאנסי.
דאנערשטאג נאכט וועט פארקומען די צענטראלע שבע ברכות אין ביהמ"ד הגדול אין שיכון סקווירא, וואו טויזענטער חסידי סקווירא וועלן זיך מיטפרייען בשמחת רבם ומאורם, און עס וועט נאכפאלגן מיטן שבת שבע ברכות בצל הקודש אין ביהמ"ד הגדול אין שיכון סקווירא.
דער זיידע פון חתן כ"ק אדמו"ר מזוועהיל ארה"ב שליט"א איז היינט אנגעקומען צוגאסט בשערי ארץ הקודש לכבוד די שמחה, און וועט פראווענען דעם קומענדיגן שבת פרשת כי תצא אין סקווירא בית המדרש אין ירושלים, וואו עס וועט פארקומען א גרויסע שמחת הפארשפיל מוצאי שבת קודש לכבוד די שמחה. אזוי אויך האט דער סקווירא רבי שליט"א געשיקט א שליח קיין ארץ ישראל, בנו הגה"צ ר' יצחק טווערסקי שליט"א וועלכער וועט באשיינען די שמחת החתונה, און אזוי אויך באשיינען די שמחת החתונה פון א אייניקל ביים שווער כ"ק אדמו"ר מוויזניץ שליט"א לרפו"ש וואס קומט פאר מארגן מיטוואך אין קרית וויזניץ בני ברק, און די שמחת החתונה פונעם ערשטן אור אייניקל ביי כ"ק אדמו"ר ממאחנובקא בעלזא שליט"א וואס קומט פאר די קומענדיגע וואך.
היינט איז געמאלדן געווארן מטעם בית כ"ק אדמו"ר מסקווירא שליט"א, אז קומענדיגן זונטאג יום החופה, אין די צייט וואס די שמחת החתונה וועט געפראוועט ווערן אין ארץ ישראל, וועט דער רבי שליט"א אפרעכטן א ספעציעלע סעודה לכבוד די שמחה בביתו נאוה קודש, אינאיינעם מיט די קינדער און אייניקלעך, כשתילי זיתים סביב לשולחנו.
