תלמידי וחסידי סאטמאר אין בארא פארק גרייטן זיך מיטצולעבן געהויבענע טעג בצל הקודש פון כ"ק אדמו"ר מסאטמאר שליט"א, זיך גרייטענדיג צו די ימי השמחה בחצר הקודש, שמחת החתונה פונעם רבינ'ס אייניקל וואס וועט פארקומען אין בארא פארק, און די נאכפאלגענדע שבת של שמחה וואס דער רבי שליט"א וועט פראווענען אינעם עיר ואם בישראל בארא פארק, אינאיינעם מיט הונדערטער חסידים תושבי העיר חסידים ואנשי מעשה.
די רעדע איז פון די שמחת החתונה פון די כלה א טאכטער ביים רבינ'ס זון הגה"צ ר' יעקב בער טייטלבוים שליט"א אבד"ק סיגעט, מיט די חתן א זון פון הגה"צ ר' יהושע שלום ווייס שליט"א אבד"ק ספינקא, בנו הגדול פון כ"ק אדמו"ר מספינקא שליט"א, און איידעם ביי הגה"צ אבד"ק פאפא ב"פ שליט"א, וואס קומט פאר בשעה טובה ומוצלחת דעם קומענדיגן זונטאג פרשת וישלח הבעל"ט.
די מעמד קבלת פנים וועט פארקומען אין ביהמ"ד הגדול דקהל יטב לב ד'סאטמאר אויף די צוויי און פופציגסטע סטריט, און די מעמד החופה ברחובה של עיר פארנט פון ביהמ"ד במקהלות עם רב חסידים ואנשי מעשה. דערנאך וועט פארקומען די סעודה און ריקודין, נאכגעפאלגט מיט די געהויבענע מצוה טאנץ, אינעם גרויסן זאל אויף די זיבן און דרייסיגסטע סטריט אין בארא פארק.
לכבוד די שבת שבע ברכות וועט דער סאטמארער רבי שליט"א פראווענען א געהויבענע שבת של שמחה אין בארא פארק, זייענדיג א געלעגנהייט פאר די הונדערטער חסידים תושבי העיר מיטצוהאלטן די תפילות און טישן בצל הקודש. די היכל ביהמ"ד הגדול דקהל יטב לב ד'סאטמאר וועט אויסגערישט ווערן מיט די מאקסימום פלעצער צו קענען אקאמאדירן דעם ריזן ציבור וואס וועלן קומען מיטהאלטן די געהויבענע שבת בצל הקודש.
