כ"ק אדמו"ר מראחמיסטריווקא שליט"א פון ספרינג וואלי וועט דעם ענדע וואך ארויספארן אויף א מסע הקודש קיין ארץ ישראל, צו באשיינען א שמחה אין די משפחה, די געהויבענע באזוך וועט זיין א געלעגנהייט פאר חסידיו ומעריציו תושבי ארה"ק ליהנות מזיו אורו, און מיטהאלטן דעם ערשטמאליגן שבת וואס דער רבי שליט"א וועט פראווענען אינעם עיר התורה והחסידות בני ברק.
דער רבי שליט"א וועט ארויספארן מיטוואך פרשת ויצא און אנקומען קיין ארץ ישראל דאנערשטאג מיטאג. אין לויף פון די ימי הביקור וועט דער רבי שליט"א זיך אויפהאלטן אין ירושלים עיה"ק בבית אמו הרבנית תליט"א, און פוקד זיין די קברי צדיקים און מקומות הקדושים אשר בארץ המה.
שבת קודש וועט דער רבי זיין צוגאסט אין בני ברק, לרגל די שמחת האויפרוף פונעם חתן א זון ביים רבינ'ס שוואגער הגה"צ ר' אהרן טווערסקי שליט"א אב"ד טשערנאביל ירושלים בן כ"ק אדמו"ר מטשערנאביל שליט"א, מיט די כלה א טאכטער פון הגה"צ ר' חיים מאיר טווערסקי שליט"א, זון פונעם רבינ'ס פעטער הגה"צ אבד"ק זלאטיפאלי שליט"א פון מאנסי, און איידעם ביי כ"ק אדמו"ר מטשערנאביל שליט"א. די תפילות און טישן ליל שבת און שבת צופרי וועט דער רבי מיטהאלטן ביים שבת של שמחה בחצר הקודש טשערנאביל, און שלש סעודות און מלוה מלכה וועט דער רבי שליט"א אפרעכטן אויף א גרויסן פארנעם אין ראחמיסטריווקא בית המדרש אויף רחוב יעל.
דינסטאג פרשת וישלח וועט דער רבי באשיינען די שמחת החתונה וואס וועט פארקומען אין ביהמ"ד הגדול טשערנאביל אין בני ברק, צומארגנס מיטוואך וועט דער רבי באשיינען די שמחת החתונה אין ביהמ"ד הגדול אין קרית וויזניץ בני ברק, פון די כלה א אייניקל ביי זיינע פעטער'ס כ"ק האדמורי"ם מוויזניץ שליט"א פון וויליאמסבורג און בית שמש, און דאנערשטאג פרשת וישלח וועט זיך דער רבי שליט"א אומקערן למעון קדשו אין מאנסי.
