דעם פרייטאג ערב יום הקדוש ביים טיש, האט כ"ק אדמו"ר מוויזניץ שליט"א צום ערשטן מאל אדרעסירט ברבים זיין מצב הבריאות, זאגענדיג אז ער גרייט זיך אנצוהייבן א סעריע באהאנדלונגען, און די חסידים זאלן דאווענען לרפואתו, כ"ק מרן ישראל בן לאה אסתר לרפואה שלימה.
דער רבי האט ערווענט אז ער הערט שמועסן אז די חסידים זענען זייער באזארגט און פארפאניקט, מען דארף אבער וויסן אז דער רבונו של עולם וועט העלפן, און אויסער הייסע תפילות פאר זיין רפואה דארף מען זיך נישט זארגן, און מען זאל זיך נישט זארגן, נאר גלייבן באמונה שלימה אז עס וועט זיין גוט.
ליל יום הקדוש האט דער רבי אויפגעטרעטן מיט קורצע ווערטער און געבעטן די חסידים זיך פארצונעמען קבלות טובות נישט צו רעדן ביים דאווענען, דערנאך האט בנו הגדול הגה"צ ר' חיים מאיר האגער שליט"א אב"ד קרית וויזניץ ב"ב אויפגעטרעטן מיט ווערטער און ארומגערעדט איבער די חשיבות פון זיך מקבל זיין נישט צו רעדן ביים דאווענען, און דאס וועט זיכער זיין די שטערקסטע סגולה אז דער טאטע דער רבי זאל זיין געזונט זאל האבן א גענצליכע רפואה.
היינט זונטאג איז דער רבי אריינגעפארן צו די איכילוב שפיטאל אין תל אביב, וואו מען האט אנגעהויבן די ערשטע אין די סעריע פון באהאנדלונגען, מיטן האפענונג אז עס זאל האבן די ריכטיגע ווירקונג לטובה און דער רבי זאל זיך ווי שנעלער ערהוילן, אן קיין זייטיגע קאמפלעקאציעס. לויטן פלאן וועט דער רבי פארבלייבן אין שפיטאל פאר דריי טעג ביז ערב סוכות, מיטן האפענונג צו קענען פראווענען די פרייליכע ימים טובים בבריות גופא ונהורא מעליא.
