אין א ערשטמאליגע שריט איז געפלאנט א גרויסארטיגע "יום שכולו טוב" פאר די טויזענטער בחורים חסידי סאטמאר ברחבי ניו יארק, וואס וועלן פארברענגען א געהויבענע טאג בצל הקודש בימי החג, און מיטהאלטן א ערשטמאליגע חול המועד מיטאג טיש אין שפיץ פונעם רבי'ן, ארומגענומען מיט תלמידיו הקרוים בנים.
די גרויסע מאורע ווערט צוגעשטעלט דורך פארשידענע אפטיילונגען אינערהאלב קהל יטב לב ד'סאטמאר, התאחדות אברכים, מסגרת בחרתו, און מפעל להעלות, ווען דורכאויס די יום שכולו טוב וואס וועט פארקומען מאנטאג חול המועד סוכות, וועט מען מיטהאלטן א רייע אינהאלטסרייכע מעמדים, אנגעהויבן פון תפילת שחרית הלל און מוסף אינאיינעם מיט כ"ק אדמו"ר מסאטמאר שליט"א בהיכל ביהמ"ד הגדול אין קרית יואל.
נאכן דאווענען וועט דער רבי שליט"א צום ערשטן מאל אפרעכטן א מיטאג טיש חול המועד אין די גרויסע סוכה נעבן ביהמ"ד, ספעציעל מיט די בחורי חמד, וואו דער רבי וועט משמיע זיין דברות קודש לכל העם הנאספים. עס וועט נאכפאלגן מיט א לענגערע מעמד "שמח בחור" אין די פראכטפולע זאלן פון גינת קליין אין קרית יואל, וואו עס וועט זיין א ספעציעלע רייכע מוזיקאלישע פארשטעלונג, מיט א אינהאלטסרייכע אויפטריט דורך הרה"ג ר' הלל יואל קעפעטש שליט"א איבער די פלאם פון חסידישע נגינה.
עס איז ערווארטעט אריבער צוויי טויזענט בחורי חמד פון ישיבות הקדושות ד'סאטמאר, פון קרית יואל, וויליאמסבורג, מאנסי, און בארא פארק, באסעס ווערן צוגעשטעלט פון אלע שטעט, און באזונדערע פארענטשעס ביים דאווענעם און ביים טיש וועט זיין צוטיילט לויט די שטעט.
