די שטאט וויליאמסבורג לעבט מיט א שווערע טראגעדיע, ווען היינט איז נפטר געווארן האשה החשובה מרת טעמא רחל תמר יאקאבאוויטש ע"ה, וועלכע איז ליידער אראפגעקלאפט געווארן דורך א זאמד טראק מיט עטליכע וואכן צוריק, ביים ווינקל פון ווייט עוועניו און וויליאמסבורג סטריט וועסט.
די עקסידענט האט פאסירט דינסטאג פרשת וישב פארמיטאג, ווען זי האט שפאצירט אויף ווייט עוועניו און איז אראפגעקלאפט געווארן דורך א זאמד טראק, הצלה לייט האבן איר פרובירט צו ראטעווען, און איר אפגעפירט אין שפיטאל זייענדיג אין א קריטישע צושטאנד. די לעצטע פאר וואכן האבן פילע אידן געדאווענט לרפואתה, ווען דאקטוירים אין די בעלוויו שפיטאל האבן פרובירט צו סטאביליזירן די מצב, אבער ליידער איז זי היינט צופרי נפטר געווארן פון די שווערע וואונדן ה"י.
מרת יאקאבאוויטש ע"ה איז געווען דריי און פופציג יאר אלט, אשת הרב החסיד ר' יהושע וואלף יאקאבאוויטש הי"ו מחשובי חסידי סאטמאר, און זי לאזט איבער א שיינע דור בליעה"ר. די לוויה קומט פאר יעצט פארמיטאג ביי יראים טשאפל אויף בראדוועי אין וויליאמסבורג.
