יעצט פארמיטאג איז כ"ק אדמו"ר מסאטמאר שליט"א ארויסגעפארן אויף א בליץ נסיעה קיין מיאמי פלארידע, צו מבקר חולה זיין ביים לעגענדארן תומך תורה הנגיד החסיד המרומם ר' ישראל דוב גאלדבערגער הי"ו, וועלכער איז שפיטאליזירט דארט אין פלארידע צוליב פארשידענע געזונטהייט קאמפליקאציעס.
ווי באקאנט איז הנגיד הישיש ר' ישראל דוב הי"ו פון די גרעסטע תומכי הקהילה והמוסדות בחצר הקודש סאטמאר, זייענדיג מנדב בנינים אדירים ומבצרים לתורה ויראה, סיי פאר די חדר יונגלעך, און סיי פאר די בנות ישראל הכשרות, ר' ישראל דוב לאזט זיך קאסטן שווערע מיליאנען למען החזקת מוסדות סאטמאר אין אלע שטעט, און מיט קארגע צוויי וואכן צוריק איז ער אנטקעגן געקומען די עסקנים מיט א פאנטאסטישע נדבה פון עטליכע מיליאן דאללער, אפצוקויפן דעם זכות שם ההיכל אין ביהמ"ד הגדול סאטמאר אין וויליאמסבורג, בית מדרשו של רבי וואו הרה"ק מסאטמאר זי"ע האט נאך אפגעראכטן די עבודת הקודש בחיים חיותו, וואס גייט אריבער אין די יעצטיגע תקופה א פולשטענדיגע איבערפרישונג און איבערבוי.
זייענדיג אין מיאמי פלארידע אויף אפרוה אין די קאלטע ווינטער טעג, איז ר' ישראל דוב אריינגעפירט געווארן אין שפיטאל צוליב פארשידענע געזונטהייט קאמפליקאציעס, און כ"ק אדמו"ר מסאטמאר שליט"א האט אויסגעדרוקט רצון קדשו ארויסצופארן קיין פלארידע צו אים מבקר חולה זיין אין שפיטאל, טראץ וואס מען שטייט א קארגע מעת לעת בעפאר די שמחת החתונה פון א אייניקל.
יעצט פארמיטאג איז דער רבי ארויסגעפארן מביתו נאוה קודש אויפן וועג צום טיטערבארא לופטפעלד, פון וואו דער רבי הייבט זיך אצינד מיט א פריוואטע פליגער אויפן וועג קיין פלארידע, דער רבי וועט זיך אויפהאלטן דארט פאר עטליכע שעה, און זיך באלד אומקערן אהיים למעון קדשו אין וויליאמסבורג, זיך גרייטענדיג צום גרויסן שמחת החתונה במעון קדשו וואס קומט פאר מארגן אין וויליאמסבורג.
