נעכטן מאנטאג איז כ"ק אדמו"ר מדזיקוב וויזניץ שליט"א אנגעקומען אויף א געהויבענע באזוך אין ניו יארק, אויפצוטרייבן גרויסע געלטער צו פינאנצירן די מאסיווע בוי פראיעקט, אהערצושטעלן די נייע ביהמ"ד הגדול דזיקוב וויזניץ אין בית שמש.
דורכאויס די קומענדיגע וואך וועט דער רבי האבן די אכסניא אין בארא פארק, אין שטוב פון הנגיד החסיד ר' אברהם שלמה איינהארן הי"ו ראה"ק וויזניץ ב"פ, און ארויפגיין לבתי נגידים ושועים וואס וועלן צולייגן א פלייצע צום גרויסן אונטערנעמונג, צוצוברענגען הרחבת הדעת פאר די הונדערטער חסידים בכל עת ועידן.
דעם קומענדיגן שבת קודש פרשת שמות וועט דער רבי שליט"א פראווענען אינעם עיר ואם בישראל בארא פארק, די טיש פרייטאג צונאכטס וועט פארקומען אין די גרויסע באיאנער קלויז, וואו דעם רבינ'ס איידעם הגה"צ רבי מרדכי שלמה ברייאר שליט"א רב חסידי באיאן אין אמעריקע איז משמש ברבנות, תחת דגלו והדרכתו פון אביו הגדול דעם רבינ'ס מחותן כ"ק אדמו"ר מבאיאן שליט"א.
א גרויסע ציבור תושבי העיר איז ערווארטעט זיך צו באטייליגן ביים טיש, און ביי די אנדערע תפילות און שלש סעודות וואס וועט געפראוועט ווערן בבית מדרשו פון זיין פלומעניק, קהל מנחה חדשה דזיקוב וויזניץ, בנשיאות כ"ק אדמו"ר מדזיקוב וויזניץ ב"פ שליט"א.
