אין שטאט דאמבראווא אין פוילין ווערן שוין געמאכט די נויטיגע צוגרייטונגען צו אנטפאנגען די הונדערטער אידן וואס וועלן אנקומען אין שטאט די קומענדיגע וואך, צו פוקד זיין דעם ציון הק' פון הרה"ק רבי מרדכי דוד מדאמבראווא זי"ע וועמענס הילולא קדישא עס געפאלט זונטאג ז' שבט.
נאך וואס אין די פריערדיגע יארן איז געווען היבש שווער אנצוקומען צום ציון הק', איבערהויפט אין די יארצייט טאג און די טעג ארום, וואס קומט אויס אין סאמע צענטער פון די ווינטער סעזאן, ווען די גאנצע ראיאן איז אנגעלייגט מיט שניי און אייז, האבן א גרופע עסקנים זיך אריינגעלייגט צו פארזיכערן אז די מקום קדוש זאל זיין אהערגעשטעלט כראוי וכיאות לכבודו של צדיק, און פאריאר צום יומא דהילולא קדישא איז טאקע געווארן אוועקגעשטעלט די וועד הכנסת אורחים צוצושטעלן אלע באדערפענישן פאר די מתפללים ביים ציון הק'.
היי יאר ווען די יומא דהילולא קדישא געפאלט מוצאי שבת קודש און זונטאג ביום ז' שבט, וועט די בנין בית הכנסת און הכנסת אורחים נעבן דעם ציון הק' זיין צוגעשטעלט מיט אלע באדערפענישן דורכאויס אלע שעות פון מוצאי שבת ביז זונטאג שפעט ביינאכט, די צענטראלע יארצייט סעודה וועט פארקומען נאך תפילת מנחה פיר אזייגער נאכמיטאג.
