אין די צייט וואס דאס יהדות החרדית אין ארץ ישראל האט געשטורעמט און געקאכט די לעצטע פיר און צוואנציג שעה, נאכפאלגענדיג די שרעקליכע טראגעדיע וואס האט פאסירט אין א פלעיגרופ אין ירושלים עיה"ק, ווען די מדינת ישראל אינסטאנצן האבן געוואלט פאלמעסן די צוויי יונגע נפטרים ה"י, הערט מען היינט אז די העכסטע געריכט אין מדינת ישראל האט ארויסגעגעבן דעם אורטייל נישט צו פאלמעסן די קינדער.
ווי באריכטעט נעכטן האט פאסירט א שרעקליכע טראגעדיע אין א פלעיגרופ אין די רוממה געגנט אין ירושלים, ווען צוויי קליינע קינדערלעך זענען געפונען געווארן נישט בין החיים רח"ל, א העפטיגע אויספארשונג איז געלאזט געווארן אין גאנג, ווען די בעיביסיטערס זענען פארהאלטן געווארן פאר אויספארשונגען און געפונען זיך אצינד אונטער ארעסט, טראץ וואס עס איז נישט פארהאן קיין קלארע קלאגעס קעגן זיי.
וועלנדיג געוואויר ווערן די אורזאך פון די געשיכטע, נאך וואס א דרויסענדיגע אונטערזוכונג האט גארנישט באשטעטיגט, האבן די אינסטאנצן געוואלט פאלמעסן די קינדער רח"ל, און די אונטערשטע געריכט האט עס באשטעטיגט. נאך א העפטיגע געריכט סעסיע ווען די עלטערן פון די קינדער און די זק"א אגענטור האט געקעמפט ביי די העכסטע געריכט, איז נישט לאנג צוריק ארויסגעקומען די אורטייל אז מען דארף נישט דורכפירן קיין ניתוחי מתים.
די גאסן אין ארץ ישראל האבן געשטורעמט און געפלאקערט זינט נעכטן נאכט, ווען טויזענטער אידן זענען ארויסגעקומען מוחה זיין כדת של תורה, בהוראת הקודש פון די גדולי הדור, און יעצט נאכמיטאג אין ארץ ישראל ווען עס איז אנגעקומען די גוטע בשורה האבן זיך די מאסן הפגנות אפגעשטילט, מיטן האפענונג אז די נפטרים זאלן וואס שנעלער באפרייט ווערן לקבורה.
