אידישע קינדער זענען טיף אויפגעשוידערט נאך די שרעקליכע טראגעדיע וואס האט פאסירט היינט נאכמיטאג אין ארץ ישראל, ווען א חשובער ישיבה בחור פון די סאטמארע ישיבה אין קוממיות איז ל"ע טראגיש אומגעקומען, נאכן ווערן אראפגעקלאפט דורך א באס ביים אריינגאנג קיין קוממיות, זייענדיג אויפן וועג אהיים פון א הפגנה קעגן ניתוחי מתים ה"י.
הב' החשוב נפתלי צבי קרעמער ע"ה אכצן יאר אלט, א זון פון להבחל"ח הרב החסיד ר' ישכר דוב קרעמער הי"ו מחשובי חסידי סאטמאר אין ירושלים, און א אייניקל פון הרב החסיד ר' מנשה גאטליעב הי"ו, איז אויפגעוואקסן אין די סאטמארע מוסדות אין ירושלים, אריינגייענדיג אין ישיבה גדולה איז ער אריין לערנען אין די בארימטע סאטמארע ישיבה אין קוממיות, וואו ער איז געשטיגן בדרכי התורה והיראה מיט גרויס התמדה.
על פי קריאת גדולי הדור זענען די תלמידי הישיבה ארויס היינט ברחובה של עיר מוחה זיין כדת של תורה, קעגן די ניתוחי מתים וואס איז געווען געפלאנט נאך די שוידערליכע טראגעדיע נעכטן אין ירושלים עיה"ק, און זייענדיג אויפן וועג צוריק איז ער געווארן אראפגעקלאפט דורך א באס, און איז ליידער נפטר געווארן פון די שווערע וואונדן.
אנדערע בחורים וואס האבן שפאצירט צוזאמען, און אזוי אויך די רייזנדע אויפן באס, האבן איבערגעגעבן אז דער באס דרייווער איז געפארן זייער ווילד זייענדיג אויפגעברויזט וועגן די הפגנות, און אז ער האט בייזוויליג אראפגעקלאפט דעם בחור, ליידער האט אבער פאסירט די שרעקליכע טראגעדיע, וואס האט אויפגעשוידערט יעדן ארום און תלמידי וחסידי סאטמאר בפרט.
ויהי רצון שלא ישמע עוד שוד ושבר בגבולינו, ושנשמע ונתבשר בשורות טובות.
