די נגידים ותומכים בחצר הקודש טשערנאביל, וואס האבן זיך אנגעשלאסן מיט גרויסע סכומים צו פארענדיגן די מאסיווע בוי פראיעקט אויפצובויען די גיגאנטישע בנין ביהמ"ד הגדול טשערנאביל אין בני ברק, האבן זוכה געווען מיטצולעבן א געהויבענע שבת בצל הקודש פון כ"ק אדמו"ר מטשערנאביל שליט"א, אינעם שטעטל דאוואס אין שווייץ כשהמלך בשדה, ווען דער רבי האלט זיך דארט אויף למנוחת הנפש.
די שבת איז געפראוועט געווארן אין די בארימטע קארעסטא האטעל, וואו די נדיבים האבן זוכה געווען להסב על שולחן המלך, מיטהאלטן די תפילות און טישן אינאיינעם מיטן רבי'ן מיט א זעלטענע קירבה יתירה. אלס נואם הכבוד איז געקומען צו פארן הרה"ג ר' מרדכי הערש שפיטצער שליט"א ר"י תורת צבי ספינקא, וואס האט אויפגעטרעטן מיט הפלא'דיגע דרשות דורכאויס דעם שבת.
ביים סעודה פרייטאג צונאכטס האט מען אויך געהערט א דרשה פונעם רבינ'ס פריוואטע דאקטער דר. לעווינגער, וואס האט ארויסגעברענגט די וויכטיגקייט פון אהערשטעלן דעם נייעם ביהמ"ד ארויסצוהעלפן דעם רבינ'ס מצב הבריאות און הרחבת הדעת.
שבת אינדערפרי האט איינער פון די נגידים אפגעקויפט דעם רבינ'ס עליה פאר די פאנטאסטישע סומע פון א מיליאן דאללער לטובת דעם נייעם ביהמ"ד, מוצאי שבת איז פארגעקומען א גייסטרייכע מלוה מלכה וואו עס האט אויפגעטרעטן דער יושב ראש פון די קרן הבנין הרב נתן אללעך הי"ו גבאי הביהמ"ד, דער רבי שליט"א האט אויפגעטרעטן מיט דברות קודש, און א ספעציעלע דרשה איז געהערט געווארן דורך הנגיד החסיד ר' אברהם שלמה איינהארן הי"ו ראה"ק וויזניץ אין בארא פארק.
