היסטארישע נייעס ווערט געמאלדן היינט מטעם בית כ"ק אדמו"ר מבעלזא שליט"א, אז אויף אן ערשטמאליגע פארנעם וועט דער רבי שליט"א פראווענען א שבת ספעציעל מיט נדיבים בעם, צו פאראויסרוקן א מאסיווע פראיעקט צו אויפבויען פינף נייע גיגאנטישע בנינים פאר די ישיבות הקדושות דחסידי בעלזא אין ארץ ישראל.
די ממלכת התורה די ישיבות הקדושות דחסידי בעלזא אין ארץ ישראל, נעמט אריין טויזענטער בחורי בעלזא פון איבער די גאנצע וועלט, און מיט די נאכאנאנדע בליה און וואוקס האט זיך שטארק אנגעזעהן דעם לחץ זו הדחק, וואס האט געשטופט די עסקני המוסדות אריינצושפרינגען אין א מאלטי מיליאן דאללערדיגע פראיעקט אויפצובויען פינף שפאגל נייע גיגאנטישע בנינים פאר די ישיבות הקדושות, ווי פארשטענדליך מיט די געמיינזאמע הילף פון אלפי חסידי בעלזא ברחבי תבל.
אצינד ווערט געמאלדן די נייעס אז אין א ערשטמאליגע פארנעם וועט געפראוועט ווערן א שבת פאר נדיבי לב, די וואס שליסן זיך אן מיט אסטראנאמישע סכומים פארן גרויסן פראיעקט, ווען אין א זעלטענע שריט וועט כ"ק אדמו"ר מבעלזא שליט"א פארלאזן ביתו נאוה קודש אין קרית בעלזא ירושלים און פראווענען א שבת מחוץ לעיר מיט די נדיבי לב.
די שבת איז באשטימט אויף פרשת אחרי קדושים, אנהייב חודש אייר הבעל"ט, און וועט פארקומען אין א פראכטפולע האטעל אויף די בערג ארום ירושלים, וואו די נדיבי לב וועלן האבן די זכיה להסב על שולחן מלכים און מיטלעבן די געהויבענע תפילות און טישן בצל הקודש כשהמלך בשדה.
אין די יעצטיגע טעג איז געלאזט געווארן אין גאנג א העפטיגע עסקנות פראיעקט צו איינלאדענען די חסידים נגידים ותומכים זיך אנצושליסן אין דעם הייליגן חבורה, צוצולייגן א פלייצע פאר די הנהלת המוסדות, און דערביי זוכה זיין מיטצולעבן די היסטארישע מאמענטן על שולחן המלך.
