אין די יעצטיגע טעג ווערט באקאנט א שטארקע דורכברוך ביי תושבי ניו יארק, ווען עס איז געלאזט געווארן אין גאנג א נייע הצלה סיגנאל צו אלארמירן חברה הצלה אין פאל פון נויט, ווען מען הייבט אויף די האנט אין פארעם פון פיר פינגערס, וואס וועט זיין א צייכן אז הצלה לייט דארפן זיך אהיניאגן צו דעם ספעציפישן ארט.
די פרישע דורכברוך ווערט געלאזט אין גאנג יעצט בעפאר ל"ג בעומר, ווען מען גרייט זיך אויף גרעסערע מעמדים בחצרות הקודש, די היסטארישע מעמד הכנסת ספר תורה בחצר הקודש סאטמאר אין וויליאמסבורג, די גרויסארטיגע מעמד ההדלקה בחצר הקודש סאטמאר אין קרית יואל, און נאך פילע מעמדים וואס ציען משתתפים אין די טויזענטער ציפערן.
מיט א האלבע יאר צוריק ביים גרויסן מעמד כ"א כסלו בחצר הקודש סאטמאר, וואס איז פארגעקומען אין די גיגאנטישע קרוינהייטס ארמארי געביידע, האט ליידער פאסירט א שווערע אינצידענט ווען א עלטערע איד איז פלוצלינג צוזאמגעפאלן אויפן אויבן אן, בחסדי ה' איז ער באצייטנס געראטעוועט געווארן א דאנק די שנעלע רעאקציע פון הצלה לייט, אבער עס האט געברענגט אז מען זאל אריינקוקן אין די פאקט אז ביי גרעסערע פארזאמלונגען מיט הויכע געזאנג איז גאר שווער צו אלארמירן הצלה, אז די רעטונגס לייט זאלן וויסן גענוי די ארט וואו צו לויפן פאר הילף.
נאך מערערע באראטונגען איז געמאלדן געווארן דורך חברה הצלה און די עסקני הקהילות, אז פון היינט אן וועט די דאזיגע האנט סיגנאל פון פיר פינגערס, דינען אלס הצלה סיגנאל צו אלארמירן חברה הצלה, מען זאל שנעל קענען קומען און צולייגן הילף. די דאזיגע האנט סיגנאל וועט גענוצט ווערן ביי סיי וועלכע גרויסע מעמד וואס איז שווער צו קאמיוניקירן צוליב די הויכע געזאנג, און צו קענען אידענטיפיצירן און אנצייגן די גענויע ארט וואו אהין צו לויפן.
ביי אן אסיפת עסקנים לקראת די גרויסע מעמד הכנסת ספר תורה בחצר הקודש סאטמאר, האט דער ראש העסקנים הרה"ח ר' יצחק אייזיק דאסקאל הי"ו געמאלדן איבער די פרישע דורכברוך, זאגענדיג אז דאס איז אויסגעארבעט מיט אלע גרויסע קהילות און די חברה הצלה אין ניו יארק, מען זאל קענען זיין גרייט צו העלפן על כל צרה שלא תבוא.
