יעצט מאנטאג אינדערפרי קומט אן די ביטערע בשורה פון די מאונט סיני שפיטאל אין מאנהעטן, איבער די פטירה בשיבה טובה פון הרבנית הצדיקת מראחמיסטריווקא ע"ה, מחברתו הטהורה ועזרתו בקודש פון כ"ק אדמו"ר הרה"ק מראחמיסטריווקא זצ"ל, וברתא דמלכא קדישא פון כ"ק אדמו"ר הרה"ק מסקווירא זצ"ל, אין טיפן עלטער פון דריי און ניינציג יאר.
די רעבעצין עליה השלום איז געווען א שריד לדור דעה, א צווייגעלע פון אמאל מגזע אראלים ותרשישים, וועלכע האט נאך זוכה געווען צו זעהן דער אלטער היים מיטן אמאליגן חן, די פארצייטישע חסידים און די לעכטיגע תקופות בצל הקודש פון די הייליגע צדיקים הקודמים.
כ"ג טבת תרצ"ג איז די רעבעצין ע"ה געבוירן געווארן אין שטאט קאלאראש אין ראמעניע, אלס דריטע קינד און דריטע טאכטער צו איר גרויסער פאטער דער סקווירא רבי זצ"ל, און צו איר מוטער הרבנית הצדיקת טראנא ע"ה, טאכטער פון הרה"ק רבי פיניע'לע פון אוסטילא זי"ע, ציענדיג א הערליכע יחוס למעלה בקודש צו די הייליגע צדיקים לבית טשערנאביל, סקווירא, ראחמיסטריווקא, ולמעלה בקודש.
אין אירע סאמע ערשטע יארן איז זי אויפגעוואקסן אין שויס פון איר גרויסן פאטער וואוינענדיג אין שטאט יאס אין ראמעניע, וואו דער סקווירא רבי זצ"ל האט איר מחנך געווען על דרך ישראל סבא מיט גרויס אפגעהיטנקייט ווי באקאנט. אלע יארן האט די רעבעצין גערעדט דערפון און געלעבט דערמיט, די לעכטיגע און גלאררייכע חינוך וואס זי האט ערהאלטן פון איר גרויסן פאטער, און דאס האט זי געפילעוועט און אריינגעבאקן אין אירע דורות די אלע יארן.
נאכן קריג זענען זיי ארויסגעקומען קיין אמעריקע, וואו די רעבעצין האט געשפילט א שטארקע ראלע אינעם ווידער אויפבוי פון די סקווירא הויף אין ניו יארק, סיי אלס מיידל ווען דער סקווירא רבי זצ"ל האט מייסד געווען דעם סקווירא הויף אין וויליאמסבורג, און סיי שפעטער נאך איר חתונה ווען דער סקווירא רבי זצ"ל האט מייסד געווען דעם סקווירא שטעטל אין ראקלענד קאונטי, ווען די רעבעצין ע"ה איז ארויסגעקומען וואוינען אינאיינעם מיט איר גרויסן מאן דער ראחמיסטריווקא רבי זצ"ל, אינאיינעם מיטן פאטער דער סקווירא רבי זצ"ל.
חודש אדר תשי"ד האט די חסידישע געמיינדע אין ניו יארק מיטגעלעבט די ערשטע גרויסע רעבישע חתונה על אדמת ניו יארק, ווען די רעבעצין ע"ה איז אריינגעקומען בברית הנישואין, מיט איר גרויסער מאן כ"ק אדמו"ר הרה"ק מראחמיסטריווקא זצ"ל, בנו חביבו פון הרה"ק רבי יוחנן מראחמיסטריווקא זצ"ל, די חתונה האט געצויגן די באטייליגונג פון טויזענטער אידן, און איז שטארק געדעקט געווארן בשעתו אלס די ערשטע גרויסע רעבישע חתונה אין ניו יארק.
זינט יענעם טאג איז די רעבעצין ע"ה צוגעשטאנען מיט א זעלטענע געטריישאפט אלס עזר מקודש פון איר גרויסן מאן דער רבי זצ"ל, ולעומתה ברוך יאמר, ווען דער רבי זצ"ל האט ווי באקאנט גאר שטארק געשעצט און ארויפגעקוקט אויף זיין חשובע רעבעצין, פארברענגט אינאיינעם גאר אסאך און אינאיינעם מחנך געווען דעם הערליכן דור ישרים יבורך.
ווי דערמאנט האט די רעבעצין ע"ה זיך ארויסגעצויגן וואוינען קיין סקווירא אינאיינעם מיט איר פאטער דער סקווירא רבי זצ"ל, ווען איר גרויסער מאן דער רבי זצ"ל איז געווארן אויפגענומען אלס משפיע רוחני און מרביץ תורה פאר די צעירי הצאן, די בחורים אין ישיבה וואס האבן נהנה געווען צענדליגע יארן מאור תורתו וצדקתו.
חודש סיון תשמ"ב האבן זיי זיך געצויגן קיין בארא פארק, ווען דער ראחמיסטריווקא רבי זצ"ל האט מייסד געווען דעם שיינעם הויף אין בארא פארק, ווידער האט זיך די רעבעצין אריינגעלייגט בלב ובנפש צו שטיין לימין קדשו און גאר אסאך געלייסטעט לטובת די קהילה און די בית המדרש, באגלייט דעם רבי'ן מיט זיין עבודת הקודש און מיט א אויסטערלישע איבערגעגעבנקייט געווען דער אונטערליינער פון די גאנצע קהילה פאר צענדליגע יארן.
גאר אסאך איז דא צו שרייבן איבער די געוואלדיגע מעלות און מידות טובות פון די הויכגעשעצטע ראחמיסטריווקא רעבעצין ע"ה, אבער איבער אלעם שטייט ארויס איר געוואלדיגע מסירת נפש זיך אנצוכאפן אינעם אמאל, געדענקן וואס מ'האט בייגעוואוינט ביי די פריערדיגע דורות די עלטערן און צדיקים הקודמים, און דאס פארציילן ווייטער למען יעמדו למשמרת, די קומענדיגע דורות זאלן אויך ערצויגן ווערן אויפן זעלבן אויסגעטראטענעם וועג.
די דאזיגע משאת נפשה פון די חשובע רעבעצין ע"ה האט זיך שטארק אנגעזעהן אין די לעצטערע יארן, ווען אימער די רעבעצין האט זיך געטראפן מיט איר איינציגער ברודער להבחל"ח כ"ק אדמו"ר מסקווירא שליט"א, און די שמועס איז באלד פארצויגן געווארן אויף די רייכע זכרונות פון אמאל, און די פארצייטישע חינוך און אמונה וואס מען דארף ווייטער אריינברענגען אין די קומענדיגע דורות.
די רעבעצין ע"ה האט ליידער מיטגעמאכט ביטער שווערע מיטמאכענישן אין לויף פון די יארן, אן אומבאשרייבליכע פארלוסט ווען זי האט ל"ע געדארפט באגלייטן אירע דריי עלטסטע קינדער אויפן לעצטן וועג, איר עלטסטן זון הרה"צ רבי מרדכי טווערסקי זצ"ל, וועלכער איז נפטר געווארן י"ט סיון תשנ"ב, איר צווייטע טאכטער הרבנית הצדיקת מבארניב ע"ה, אשת חבר כ"ק אדמו"ר מבארניב שליט"א, וועלכע איז נפטר געווארן י"ז כסלו תשפ"ד, און איר עלטסטן טאכטער הרבנית הצדיקת מוויזניץ ע"ה, אשת חבר כ"ק אדמו"ר מוויזניץ שליט"א פון קייאמישא, וועלכע איז נפטר געווארן פארגאנגענעם ח' אלול תשפ"ה.
און איבער אלעם האט זי פארלוירן איר קרוין, כ"ק אדמו"ר הרה"ק מראחמיסטריווקא זצ"ל וועלכער איז נסתלק געווארן לגנזי מרומים כ"ט אב תשפ"ג, אבער טראץ די אלע שוועריגקייטן האט די רעבעצין ע"ה זיך מחזק געווען אויף א זעלטענע פארנעם, און אנגעגאנגען מיט א ריינע תמימות און אמונה אינעם בורא עולם.
די רעבעצין ע"ה האט זוכה געווען לראות עולמה בחייה, א הערליכע דור פון בנין וחתנין רבנן, אירע חשובע קינדער וואס זענען ממשיך דעם שלשלת הקודש לבית ראחמיסטריווקא בעוז ובגבורה, כ"ק אדמו"ר מראחמיסטריווקא שליט"א, כ"ק אדמו"ר מראחמיסטריווקא שליט"א פון לעיקוואד, כ"ק אדמו"ר מראחמיסטריווקא שליט"א פון מאנסי, כ"ק אדמו"ר מראחמיסטריווקא שליט"א פון וויליאמסבורג, כ"ק אדמו"ר מראחמיסטריווקא שליט"א פון לינדען, און כ"ק אדמו"ר מראחמיסטריווקא שליט"א פון אוקוויין.
צו דעם ווערט פאררעכנט די הערליכע משפחות וצאצאיה הברוכים, די קינדער פון איר עלטסטן זון הרה"צ רבי מרדכי זצ"ל, בנו הגדול כ"ק אדמו"ר מראחמיסטריווקא שליט"א פון ספרינג וואלי, זיין איידעם כ"ק אדמו"ר מזוועהיל שליט"א, און די אנדערע קינדער הרבנים הגאונים. די קינדער פון איר עלטסטן טאכטער הרבנית הצדיקת מוויזניץ קייאמישא ע"ה, און די קינדער פון איר צווייטן טאכטער הרבנית הצדיקת מבארניב ע"ה. און די דריי יונגערע טעכטער וואס די רעבעצין ע"ה לאזט איבער מיט זייערע הערליכע משפחות, הרבנית אשת הגה"צ ר' מנחם נחום טווערסקי שליט"א, הרבנית אשת הגה"צ ר' מרדכי טווערסקי שליט"א בנו הגדול פון כ"ק אדמו"ר מטשערנאביל שליט"א, און הרבנית אשת הגה"צ ר' מרדכי אהרן טווערסקי שליט"א.
די ביטערע בשורה איז ליידער אנגעקומען היינט מאנטאג בהעלותך, ווען מען גרייט זיך אויף א שמחה אין די ראחמיסטריווקא הויף, די שמחת החתונה פון א אייניקל ביי כ"ק אדמו"ר מראחמיסטריווקא שליט"א פון לעיקוואד, וואס קומט פאר דעם מיטוואך בעז"ה אין בארא פארק. אזוי אויך גרייט מען זיך אויף א שמחת החתונה בחצר הקודש סקווירא דעם מיטוואך, פון א אור אייניקל ביי אור איינציגער ברודער כ"ק אדמו"ר מסקווירא שליט"א.
אצינד גרייט מען זיך צום גרויסן לוויה וואס וועט פארקומען היינט מיטאג ברחבת ביהמ"ד הגדול ראחמיסטריווקא אין בארא פארק, און דערנאך ביים בית עלמין הר שלום אין מאנסי וואו די רעבעצין ע"ה וועט געברענגט ווערן למנוחה נכונה.
וכל בית ישראל יבכו את השריפה אשר שרף ה'.
