א ביטערע אבידה האט היינט באטראפן די מלכות'דיגע רוזינער דינאסטיע, מיט די פריצייטיגע פטירה פון הגה"צ ר' חיים דוב היילפערין זצ"ל, בנו חביבו פון להבחל"ח כ"ק אדמו"ר מוואסלוי שליט"א, און חתנא דבי נשיאה פון זיין פעטער כ"ק אדמו"ר מבוהוש שליט"א, וועלכער איז היינט נפטר געווארן אין בליענדן עלטער פון זיבן און פערציג יאר, נאכן זיך מוטשענען א לענגערע צייט מיט די ביטערע מחלה ה"י.
דער חשובער נפטר איז געבוירן געווארן אין חודש אדר תשל"ט צו זיין פאטער כ"ק אדמו"ר מוואסלוי שליט"א, נצר לקדושי עליון אין די הערליכע רוזינער דינאסטיע, און צו זיין מאמע הרבנית הצדיקת מוואסלוי ע"ה, טאכטער פון הגה"צ ר' יהושע העשיל ברים זצ"ל ראש ישיבת תפארת ישראל רוזין.
אלס בחור האט ער געלערנט אין ישיבת בוהוש און אין ישיבת נועם התורה, שפעטער איז ער אריין לערנען אין די בריסקער ישיבה וואו ער איז געשטיגן בתורה והוראה. ער איז געווארן ארויסגעקליבן אלס איידעם ביי זיין גרויסן פעטער כ"ק אדמו"ר מבוהוש שליט"א, וועלכער איז אויך אן איידעם ביי הגה"צ ר' יהושע העשיל ברים זצ"ל ר"י רוזין, און פון די חשובע אדמורי"ם אין די רוזינער דינאסטיע.
הגה"צ ר' חיים דוב האט משמש געווען אלס רב פון חסידי וואסלוי אין בני ברק, און אלס ראש הקיבוץ אין די בוהושער ישיבה אין בני ברק, וואו ער האט מרביץ תורה געווען פאר תלמידים און דערהויבן אידישע קינדער לתורה וחסידות.
ליידער איז ער באטראפן געווארן א שטיק צייט צוריק פון די ביטערע מחלה ה"י, און האט זיך געמוטשעט מיט שרעקליכע יסורים ה"י, מיט בלויז דריי וואכן צוריק האט ער נאך באשיינט די שמחת החתונה פון א קינד, אבער עס איז ליידער דערקענט געווען זיין שווערע מחלה און די אויסטערלישע שוואכקייט מיט וואס ער איז געווען ארומגענומען.
די לוויה קומט פאר יעצט דינסטאג נאכמיטאג ביי ביהמ"ד וואסלוי אין די רמת אהרן געגנט אין בני ברק, דערנאך ביי ביהמ"ד הגדול בוהוש אויף רחוב חגי, אויפן וועג צום בית החיים נחלת יצחק אין גבעתיים וואו ער וועט קומען לקבורה.
דער חשובער נפטר לאזט איבער א שיינעם דור, צוויי קינדער וועם ער האט זוכה געווען צו חתונה מאכן בחייו, זיין איידעם הרב אליעזר זוסיא שטערן שליט"א אייניקל פון הגה"צ אבד"ק סקולען ב"ב שליט"א, און זיין זון הרב יצחק היילפערין שליט"א, איידעם ביי זיין שוואגער הגה"צ ר' משה נתן לעמבערגער שליט"א חדב"ן כ"ק אדמו"ר מבוהוש שליט"א, און נאך קינדערלעך אינדערהיים וואס וועלן בענקן נאך זייער טאטע.
ער לאזט איבער זיין גרויסן פאטער להבחל"ח כ"ק אדמו"ר מוואסלוי שליט"א, זיינע ברידערס הגה"צ ר' יצחק היילפערין שליט"א פון ירושלים, הגה"צ ר' ראובן היילפערין שליט"א אבד"ק זכרון משה ציריך שווייץ, הגה"צ ר' משה היילפערין שליט"א פון ניו יארק, הגה"צ ר' יעקב יוסף שלמה היילפערין שליט"א, און זיינע שוואגערס חתני האדמו"ר מוואסלוי, הגה"צ ר' חיים יחזקאל שרגא שארף שליט"א, הגה"צ ר' ישראל פנחס קארניאל שליט"א פון לאנדאן, הגה"צ ר' אברהם חיים פרענקל שליט"א, און הגה"צ ר' יחזקאל רייך שליט"א.
שנשמע ונתבשר בשורות טובות.
