בחצר הקודש סקווירא אנטוויקלט זיך א שטארקע גייסט פון חדוות התורה בקדושה ובטהרה, שטייענדיג שוין נאנט צו א יאר צום היסטארישן חגיגת הכנסת ספר תורה וואס האט פאראייניגט אלפי חסידי סקווירא אויף א מוסשטאבליכן פארנעם, זיך צו מקדש ומטהר זיין מיט קבלות טובות בעניני טעכנעלאגיע און צניעות.
דעם פרייטאג צונאכטס באלד נאכן דאווענען אין ביהמ"ד הגדול אין שיכון סקווירא, איז כ"ק אדמו"ר מסקווירא שליט"א ארויף אויף א צוגעגרייטע פלאטפארמע פארנט פונעם ארון הקודש, וואו דער לעגענדארער משמש בקודש הרב דוד בערגער הי"ו האט אויסגערופן בפקודת הקודש איבער די המשך החגיגה, שטייענדיג שוין נענטער ווי ווייטער צו מסיים זיין א גאנצע יאר זינט די גרויסע חגיגה, ווען שבת פרשת משפטים וועט מען ענדיגן ליינען אלע פרשיות אין די הייליגע ספר תורה וואס איז געשריבן געווארן דורכ'ן רבי'ן אינאיינעם מיט אלע חסידים.
דערביי האט דער רבי ארויסגעברענגט די חשיבות זיך ווידער צוזאמצוקומען אינאיינעם ברבים, און דאנקן דעם אויבערשטן אויף אלע התגברות'ן וואס דאס האט צוגעברענגט, און עס איז א צייט זיך צו מחזק זיין אין די אלע ענינים, און זיין מוסיף והולך ומעלין בקודש מיט נאך קבלות טובות אויף א שטערקערע פארנעם.
לויטן פלאן וועט פארקומען א גרויסארטיגע מעמד מוצאי שבת קודש פרשת משפטים שבת שקלים, די נאכט פון כ"ח שבט, וואס איז גענוי א יאר זינט די היסטארישע חגיגת הכנסת ספר תורה, און באותו מעמד וועט מען זיך מחזק זיין פון פריש אנצוהאלטן די קבלות און עס דערהייבן אויף א העכערע פארנעם, להיטהר ולהתקדש בקדושה של מעלה.
