מיט פארווייטאגטע געמיטער טוען חסידי סקולען בכל מקומות מושבותיהם באוויינען די ביטערע פארלוסט וואס איז געשאפן געווארן די נאכט, מיט די פטירה פונעם לעגענגארער משמש בקודש, הרב החסיד ר' קלמן מיסקי ז"ל, וועלכער האט נאך זוכה געווען צו משמש זיין לפני ולפנים ביי הרה"ק בעל נועם אליעזר מסקולען זצ"ל.
הרב החסיד ר' קלמן איז געווען א זון פון הרב החסיד ר' משה אפרים מיסקי ע"ה, און האט שוין פון זיינע יונגע יארן געהאט א נאנטע קשר מיטן סקולענער רבי'ן הרה"ק בעל נועם אליעזר זצ"ל. שפעטער האט ער זוכה געווען לשרת בקודש ביים רבי'ן זצ"ל, און אנגעהאלטן דעם נאנטן קשר בנאמנות ביי צאצאיו הקדושים די הייליגע צדיקים לבית סקולען.
וואוינענדיג אין וויליאמסבורג אלע יארן איז ער געווען פון די פני העדה בחצר הקודש סקולען, פון די שענסטע אויבן אן חסידים אויף וועם יעדער האט ארויפגעקוקט און געשעצט זיין פערזענליכקייט. ספעציעל איז געווען זיין געוואלדיגע איבערגעגעבנקייט בלב ובנפש פאר די מוסדות הקדושים חסד לאברהם, וואו ער איז צוגעשטאנען צו די רעכטע האנט פון זיינע גרויסע רבי'ס למלאות שאיפתם צו פארשפרייטן אידישקייט, און אנווארעמען אידישע הערצער לאביהם שבשמים. ער איז געווען שטארק אריינגעטון בעובי הקורה צו פארזיכערן די עקזיסטענץ פון חסד לאברהם אין יעדן הינזיכט.
ליידער האט ער זיך געמוטשעט מיט א שווערע קרענק די לעצטע תקופה, און פארלאפענע וואך זענען די ברידער האדמורי"ם מסקולען שליט"א פון וויליאמסבורג, מאנסי, און לעיקוואד, ארויסגעפארן ספעציעל אויף א תפילה ביים ציון הק' פון אדמור"י בית סקולען, צו מתפלל זיין און מעורר זיין רחמי שמים פארן עבד מלך כמלך.
די נאכט איז ר' קלמן נפטר געווארן לחיי העולם הבא אין עלטער פון פיר און זיבעציג יאר, איבערלאזנדיג א הערליכע דור בליעה"ר, דארונטער א חתן וכלה אינמיטן די שבעת ימי המשתה. די לוויה קומט פאר יעצט פארמיטאג ביים סקולענער בית המדרש אויף קיעפ סטריט אין וויליאמסבורג, און ער ווערט געפירט קיין מאנסי וואו ער וועט קומען לקבורה אויפן וויזניצע בית החיים, סמוך ונראה צום ציון הק' פון זיינע גרויסע רבי'ס, נשמתם בגנזי מרומים.
