תושבי לאס אנדזשעלעס גרייטן זיך בהדרת כבוד צו מקבל פנים זיין דעם חשובן גאסט, כ"ק אדמו"ר מוויזניץ שליט"א פון מאנסי, וועלכער איז ערווארטעט די וואך אויף א געהויבענע באזוך אין שטאט, מיטן ציהל אויפצוטרייבן סכומים אדירים לטובת די וויזניצע מוסדות המתנוסס לתפארה אין שיכון וויזניץ מאנסי, די מוסדות הקדושים וואס נעמט אריין א נעץ פון ישיבות, תלמוד תורה און מיידל שולע מיט טויזענטער תלמידים ותלמידות בליעה"ר.
שוין צענדליגע יארן וואס דער רבי שליט"א פארט יעדע שטיק צייט קיין לאס אנדזשעלעס צו אויפטרייבן געלטער לטובת די מוסדות, און גלייכצייטיג פראווענען א שבת און משפיע זיין אויף די ארטיגע אידנטום, אצינד גרייט מען זיך ווידער צום געהויבענעם שבת קודש וואס דער רבי שליט"א וועט פראווענען אין לאס אנדזשעלעס דעם שבת קודש פרשת שמות, וואו עס איז ערווארטעט א גרויסן ציבור געסט חסידי וויזניץ פון מאנסי און נאך פלעצער.
דער רבי שליט"א וועט זיך ארויסלאזן אין וועג מארגן פרייטאג גאר פרי פארטאגס, אין באגלייטונג פון פילע חסידים וואס פארן אינאיינעם מיטהאלטן דעם שבת. אין די פריע פארמיטאג שעות פון ערב שבת וועט דער רבי מופיע זיין בשערי העיר, און האבן די אכסניא אין שטוב פון הנגיד החסיד ר' זלמן גורמאן הי"ו, דער רבי וועט פארבלייבן אין שטאט פאר א פולער וואך ביז קומענדיגע ענדע וואך פרשת וארא, און דורכאויס די ימי הביקור וועט פארקומען עטליכע מסיבות און מעמדים לטובת די וויזניצע מוסדות אין מאנסי.
שבת קודש וועט דער רבי פראווענען ברוב עם אין די חסידישע כולל יחיאל יהודה, און פרייטאג צונאכטס וועט דער רבי דאווענען מנחה און קבלת שבת אין ביהמ"ד בית יהודה.
