חסידים ואנשי מעשה תושבי עיר ואם בישראל בארא פארק, גרייטן זיך מיט גרויס התרגשות מיטצולעבן א געהויבענע שבת בצילא דמהימנותא פונעם חשובן גאסט פון ארץ ישראל, כ"ק אדמו"ר מדזיקוב וויזניץ שליט"א, וועלכער וועט פראווענען א גרויסע שבת בתוככי העיר במקהלות אלפי חסידים ואנשי מעשה.
דער רבי שליט"א איז אנגעקומען די וואך צוגאסט קיין ניו יארק, אויפצוטרייבן גרויסע געלטער צו פארענדיגן די מאסיווע בוי פראיעקט פונעם נייעם גרויסן ביהמ"ד דחסידי דזיקוב וויזניץ אין בית שמש, און גלייכצייטיג משפיע זיין מהודו והדרו אויף קהל עדת חסידיו בארצות הברית.
קומענדיגן שבת קודש פרשת שמות וועט דער רבי שליט"א פראווענען אויף א גרויסע פארנעם אין בארא פארק, אינעם גרויסן היכל פון די באיאנער קלויז, וואס ווערט געפירט דורך חתנו חביבו הגה"צ רבי מרדכי שלמה ברייאר שליט"א רב חסידי באיאן אין אמעריקע, בן כ"ק אדמו"ר מבאיאן שליט"א.
א ספעציעלע באגריסונג איז געווארן ארויסגעשטעלט מטעם קהל עדת חסידי באיאן צו מקבל פנים זיין דעם חשובן גאסט בהדרת כבוד, און די עסקנים ארבעטן פיבערהאפטיג אויסצושטעלן דעם היכל הקלויז מיט די מאקסימום פלעצער פאר די טויזענטער אידן וואס זענען ערווארטעט מיטצולעבן דעם געהויבענעם שבת, בפרט דעם שולחן הטהור ליל שבת קודש מיטן וויזניצע פלאם בדרך אבותיו הקדושים.
